गरुडा- स्थानिय पालिकामा चरम बेतिथि बढेको पाइएको छ । कतै कामै नगरी भुक्तानी भएका छन भने कही बिल मात्रै बनाएर भुक्तानी भएका छन । उदाहरणको लागी रौतहटको कटहरिया नगरपालिकालाइ लिन सकिन्छ । जिल्लाको कटहरिया नगरपालिकामा कागजमै औषधि खरिद गरी ७० लाख रुपैयाँ भुक्तानी गरी भ्रष्टाचार गरेको तथ्य बाहिरिएको छ । गत असार महिनामा नगरपालिकाले औषधि खरिदको सबै प्रक्रिया पूरा गरी भुक्तानी दिइसकेको छ । कटहरिया नगरपालिका वाड नं. ४ का वडाध्यक्ष चन्दन कुशवाहालाई औषधि खरिदको भुक्तानी दिएको विषयमा जानकारी हुँदा प्रमुख प्रशासकीय अधिकृत सुरेन्द्रमान प्रधानलाई सोध्दा औषधि खरिद गरी भुक्तानी दिइसकेको र औषधि जिन्सी शाखामा राखिएको बताएका थिए ।वडाध्यक्ष कुशवाहाले जिन्सी शाखासित समन्वय गरेर जिन्सी शाखामा औषधि नभएको देखेपछि जिन्सी शाखा प्रमुख सन्तोष साह आत्तिएका छन् । जिन्सी शाखा प्रमुख सन्तोष साह र प्रमुख प्रशासकीय अधिकृत प्रधान मिलेर औषधि खरिदको सम्पूर्ण कागजपत्र मिलाई अबैध तरिकाले ७० लाख रुपैयाँ भुक्तानी दिएको बुझिएको छ ।नगरपालिकाका स्वास्थ्य शाखा प्रमुख शंकर राय यादवलाई औषधि खरिदबारे कुनै जानकारी छैन । यादव भन्छन्, ‘औषधि खरिदबारे मलाई कुनै जानकारी छैन तर फाइल रुजु गर्न दबाब आइरहेको छ ।’जिन्सी शाखा प्रमुख सन्तोष साहले स्वास्थ्य शाखा प्रमुख यादवलाई फाइलमा हस्ताक्षर गर्न, जिन्सी शाखाबाट औषधि बुझेको भरपाइमा हस्ताक्षर गर्न दबाब दिइरहेका छन् । निलम्बित नगरप्रमुख अजयप्रकाश निकटका मानिसहरूले पनि स्वास्थ्य शाखाप्रमुखलाई ७० लाखको औषधि खरिदको सम्पूर्ण प्रक्रिया मिलाउन दबाब दिइरहेको भए पनि अबैध काममा आफूले हस्ताक्षर नगर्ने यादवको अडान रहेको छ । जिन्सी प्रमुख साहले फाइल कसैलाई अध्ययनको लागि नदिएर सोझै हस्ताक्षर गराउन खोजेका छन् । स्वास्थ्य शाखामै कार्यरत साह निलम्बित नगरप्रमुख अजयप्रकाशका निकटस्थ हुन् । निलम्बित नगरप्रमुखले नै साहलाई जिन्सी शाखा प्रमुखको जिम्मेवारी दिएका थिए ।जिन्सी प्रमुख साहले औषधि खरिद भएको, भुक्तानी दिइएको र औषधि स्वास्थ्यचौकीलाई वितरण गरिएको तथा केही गोदाममै रहेको बताए पनि कुन खरिदकर्तालाई भुक्तानी दिइएको हो भन्ने कुरा आफूलाई थाहा नभएको बताउँछन् । हाकिम र लेखापालको मिलोमत्तोमा यस्तो कार्य भएको हुन सक्ने सरोकारवाला बताउछन । रौहतटका अन्य पालिकाहरुमा पनि यस्तो बेतिथि मौलाएको छ । मेयर,हाकिम र लेखापाल मिलेपछि जस्तोसुकै कार्य गर्न पनि पछि नहटेका उदाहरणहरु रौतहटमा धेरै देखिदै आएका छन । भ्रष्ट्रचारकै आरोपमा सोही नगरपालिकाका नगर प्रमुख अजय प्रकाश साह,उप प्रमुख निलम्बनमा परेका छन । उनीहरुलाइ अख्तियार अनुसन्धान दुरुपयोग आयोगले भ्रष्ट्रचार गरेको आरोपमा बिशेष अदालतमा मुद्दा दायर गरेको थियो ।
