रौतहट, साउन १
जिल्ला अदालत रौतहटको परिसरबाट प्रहरीको निगरानी छलेर फरार भएका एक थुनुवालाई प्रहरीले करिब डेढ घण्टामै पुनः पक्राउ गरेको छ। अदालतको शौचालयबाट भागेका मोटरसाइकल चोरी मुद्दाका अभियुक्तलाई व्यापक खोजी अभियान सञ्चालन गर्दै यमुनामाई गाउँपालिका अन्तर्गत बम नहर क्षेत्रबाट नियन्त्रणमा लिइएको हो।
पक्राउ पर्नेमा रौतहटको गढीमाई नगरपालिका–६ निवासी २५ वर्षीय करणकुमार यादव रहेका छन्। उनीविरुद्ध मोटरसाइकल चोरीको मुद्दामा अनुसन्धान भइरहेको थियो। प्रहरीले उनलाई पक्राउ गरी थप अनुसन्धानका लागि न्यायिक हिरासतको अनुमति लिन शुक्रबार जिल्ला अदालत गौर उपस्थित गराएको थियो।
अदालतको प्रक्रिया पूरा गर्ने क्रममा यादवले शौचालय जानुपर्ने भन्दै प्रहरीसँग अनुमति मागेका थिए। अदालत परिसरको दक्षिणतर्फ रहेको शौचालय पुगेपछि उनले प्रहरीको निगरानीलाई छल्दै फरार भएका थिए। अपराह्न करिब ४ बजेतिर भएको उक्त घटनाले केहीबेर अदालत परिसरमा तनावपूर्ण अवस्था सिर्जना गरेको थियो।
थुनुवा फरार भएको जानकारी प्राप्त हुनासाथ जिल्ला प्रहरी कार्यालय रौतहटले जिल्लाभर ‘हाई अलर्ट’ जारी गर्दै खोजी अभियान सुरु गरेको थियो। गौर, गरुडा, चन्द्रपुर, राजपुर, कटहरिया, यमुनामाईलगायत विभिन्न क्षेत्रमा रहेका प्रहरी युनिटलाई तत्काल परिचालन गरिएको थियो।
सम्भावित भाग्ने सबै मार्गमा निगरानी बढाइएको थियो भने मुख्य सडक, ग्रामीण बाटो तथा सीमावर्ती क्षेत्रहरूमा समेत प्रहरी परिचालन गरिएको थियो।
प्रहरीले फरार भएको करिब डेढ घण्टापछि गौर–चन्द्रपुर सडकखण्ड अन्तर्गत यमुनामाई गाउँपालिकाको बम नहर क्षेत्रबाट यादवलाई पुनः नियन्त्रणमा लिन सफल भएको हो। पक्राउपछि उनलाई पुनः जिल्ला प्रहरी कार्यालय ल्याई थप अनुसन्धान अघि बढाइएको प्रहरीले जनाएको छ।
जिल्ला प्रहरी कार्यालय रौतहटका प्रहरी उपरीक्षक (एसपी) सीताराम रिजालले फरार थुनुवालाई छोटो समयमै पक्राउ गर्न सफल भएको पुष्टि गर्दै घटनाबारे आन्तरिक छानबिन सुरु गरिएको बताएका छन्।
उनका अनुसार थुनुवालाई अदालत लैजाने जिम्मेवारीमा रहेका प्रहरी कर्मचारीमाथि पनि अनुसन्धान भइरहेको छ।
एसपी रिजालले प्रारम्भिक रूपमा सुरक्षा व्यवस्थामा कमजोरी देखिएको हुन सक्ने भन्दै घटनाको वस्तुगत अनुसन्धानपछि कसैको लापरबाही पुष्टि भए विभागीय कारबाही गरिने बताएका छन्। उनले अदालतमा थुनुवा उपस्थित गराउने सुरक्षा प्रणालीलाई थप व्यवस्थित बनाउन आवश्यक सुधारका विषयमा पनि समीक्षा गरिने जानकारी दिएका छन्।
अदालत परिसरबाट थुनुवा फरार हुनुले सुरक्षा व्यवस्थामाथि गम्भीर प्रश्न उठाएको छ। न्यायिक प्रक्रियाका क्रममा प्रहरी हिरासतमा रहेका व्यक्तिले सहजै भाग्न सफल हुनु सुरक्षा संयन्त्रका लागि चुनौतीका रूपमा हेरिएको छ। यद्यपि, प्रहरीको तीव्र सक्रियताका कारण फरार अभियुक्तलाई छोटो समयमै पुनः नियन्त्रणमा लिन सफल भएकाले सम्भावित थप सुरक्षा जोखिम टरेको छ।
प्रहरी स्रोतका अनुसार पक्राउ परेका यादवमाथि अब मोटरसाइकल चोरी मुद्दासँगै प्रहरी हिरासतबाट फरार भएको घटनासम्बन्धी कानुनी प्रक्रिया पनि अघि बढाइनेछ। साथै, घटनाको सम्पूर्ण विवरण संकलन गरी अदालतमा प्रतिवेदन पेश गर्ने तयारी भइरहेको जिल्ला प्रहरी कार्यालयले जनाएको छ।
.jpg)
.jpg)
