रौतहट — रौतहट निर्वाचन क्षेत्र नं. ४ का प्रतिनिधिसभा सदस्य गणेश पौडेलमाथि भएको कालो मसी प्रहारको घटनाले राष्ट्रिय राजनीतिक वृत्तमा थप तरंग सिर्जना गरेको छ। घटनाको दुई दिन दिनपछि राष्ट्रिय स्वतन्त्र पार्टी (रास्वपा) संसदीय दलले औपचारिक धारणा सार्वजनिक गर्दै उक्त घटनालाई केवल एक सांसदमाथिको दुर्व्यवहार नभई लोकतान्त्रिक मूल्य, विधिको शासन र सभ्य राजनीतिक संस्कृतिमाथिको आक्रमणका रूपमा व्याख्या गरेको छ।
शनिबार रास्वपा संसदीय दलका मुख्य सचेतक कविन्द्र बुर्लाकोटीले जारी गरेको विज्ञप्तिमा रौतहट निर्वाचन क्षेत्र नं. ४ बाट निर्वाचित सांसद गणेश पौडेलमाथि साउन ७ गते जनतासँगको भेटघाट कार्यक्रम सम्पन्न गरी फर्कने क्रममा गरिएको कालो मसी प्रहार तथा दुर्व्यवहारप्रति संसदीय दलको गम्भीर ध्यानाकर्षण भएको उल्लेख छ। विज्ञप्तिमा घटनालाई "हिंसात्मक तथा अमर्यादित गतिविधि" भन्दै त्यसको घोर भर्त्सना गरिएको छ।
रास्वपाले लोकतान्त्रिक व्यवस्थामा असहमति र विरोध व्यक्त गर्ने अधिकार प्रत्येक नागरिकलाई सुरक्षित रहेको स्वीकार गर्दै त्यसका नाममा हिंसा वा अपमानजनक व्यवहारलाई कुनै पनि हालतमा वैध ठहर गर्न नसकिने स्पष्ट पारेको छ। विज्ञप्तिमा भनिएको छ, "जनप्रतिनिधिमाथि हुने हिंसा, दुर्व्यवहार वा अपमानजनक व्यवहार कुनै पनि लोकतान्त्रिक समाजमा स्वीकार्य हुन सक्दैन।"
पार्टीले यस्ता गतिविधिले लोकतान्त्रिक संस्कारलाई कमजोर बनाउने, विधिको शासनप्रति अविश्वास बढाउने र शान्तिपूर्ण राजनीतिक अभ्यासमाथि प्रत्यक्ष प्रहार गर्ने जनाएको छ। जनप्रतिनिधिमाथि हुने यस्ता घटनाले नागरिक र निर्वाचित प्रतिनिधिबीचको लोकतान्त्रिक सम्बन्धमा समेत नकारात्मक असर पार्ने र राजनीतिक असहिष्णुता बढाउन सक्ने चेतावनी पनि विज्ञप्तिमा दिइएको छ।
रास्वपा संसदीय दलले घटनाको निष्पक्ष र विश्वसनीय अनुसन्धान गर्न नेपाल सरकार र सम्बन्धित सुरक्षा निकायलाई आग्रह गरेको छ। घटनामा संलग्न व्यक्तिहरूलाई कानुनबमोजिम कडा कारबाही गर्न, घटनाको सत्यतथ्य सार्वजनिक गर्न तथा भविष्यमा यस्ता घटना दोहोरिन नदिने गरी जनप्रतिनिधिको सुरक्षा सुनिश्चित गर्न सरकारसँग जोडदार माग गरिएको छ।
दलले जनप्रतिनिधिहरूले जनतामाझ पुगेर आफ्ना गतिविधिबारे संवाद गर्ने वातावरण सुरक्षित रहनुपर्नेमा जोड दिएको छ। लोकतान्त्रिक अभ्यासको मूल आधार नै जनप्रतिनिधि र नागरिकबीचको प्रत्यक्ष संवाद भएकाले त्यस्तो वातावरणमाथि हुने कुनै पनि प्रकारको आक्रमणलाई सामान्य रूपमा लिन नहुने र त्यसप्रति राज्य गम्भीर बन्नुपर्ने रास्वपाको धारणा छ।
विज्ञप्तिको अन्त्यमा रास्वपा संसदीय दलले लोकतान्त्रिक मूल्य, विधिको शासन, अहिंसात्मक राजनीतिक अभ्यास तथा सभ्य राजनीतिक संस्कृतिप्रति आफू सदैव प्रतिबद्ध रहेको पुनः दोहोर्याएको छ। साथै लोकतन्त्रलाई कमजोर पार्ने कुनै पनि हिंसात्मक वा अमर्यादित गतिविधिविरुद्ध कानुनसम्मत र संस्थागत ढंगले उभिने प्रतिबद्धता पनि व्यक्त गरेको छ।
रौतहटमा सांसद पौडेलमाथि भएको कालो मसी प्रहारको घटनापछि यसअघि नै विभिन्न राजनीतिक दल र संगठनहरूले पनि आ-आफ्नो धारणा सार्वजनिक गरिसकेका छन्। रास्वपा संसदीय दलको औपचारिक विज्ञप्तिसँगै घटनाले संघीय संसद् र राष्ट्रिय राजनीतिमा थप बहस सिर्जना गरेको छ।
