रौतहट, २६ साउन ।रौतहटको मौलापुर नगरपालिका–३ स्थित विद्युत् कार्यालय नजिक मौलापुर–जयनगर सडकखण्डमा भएको मोटरसाइकल दुर्घटनामा एक युवकको मृत्यु भएको घटनामा प्रहरीले वडाध्यक्षसहित दुई जनालाई पक्राउ गरेको छ ।
दुर्घटनामा संलग्न रहेको आरोपमा मौलापुर नगरपालिका–३ का वडाध्यक्ष महेश महतो कोइरी र सोही स्थानका २८ वर्षीय त्रिकिशोर कुश्वाहालाई प्रहरीले नियन्त्रणमा लिएको हो । जिल्ला प्रहरी कार्यालय रौतहटका प्रहरी नायब उपरीक्षक वसन्त गौतमका अनुसार दुवै जनालाई सवारी ज्यान मुद्दामा अनुसन्धानका लागि नियन्त्रणमा लिइएको हो ।
प्रहरीका अनुसार २०८२ साल असार ६ गते दिउँसो करिब पौने २ बजे मौलापुर–जयनगर सडकखण्डमा दुर्घटना भएको थियो । वडाध्यक्ष कोइरीले चलाएको ना.२५ प १२२५ नम्बरको मोटरसाइकल र विपरीत दिशाबाट आउँदै गरेको त्रिकिशोर कुश्वाहाले चलाएको प्रदेश २–०३–००७ प ६६६५ नम्बरको मोटरसाइकल एकआपसमा ठोक्किएका थिए ।
दुर्घटनामा त्रिकिशोरले चलाएको मोटरसाइकलको पछाडि सवार मौलापुर नगरपालिका–३ कै करिब २० वर्षीय निरज कुश्वाहा घाइते भएका थिए । दुर्घटनापछि उनको उपचार भइरहेको थियो । उपचारकै क्रममा २०८२ साल माघ १७ गते बिहान करिब साढे १० बजे निरजको मृत्यु भएको प्रहरीले जनाएको छ ।
घटनामा संलग्न दुवै मोटरसाइकलका चालकलाई प्रहरीले २०८३ साल साउन २५ गते नियन्त्रणमा लिएको हो । उनीहरूलाई नियन्त्रणमा लिएर प्रहरीले दुर्घटनाको वास्तविक कारण, सवारी चालकको सम्भावित लापरबाही तथा घटनासँग सम्बन्धित अन्य पक्षबारे अनुसन्धान अघि बढाएको जनाएको छ ।
प्रहरी नायब उपरीक्षक गौतमका अनुसार घटनाको अनुसन्धान जारी रहेकाले दुर्घटनामा कसको कति लापरबाही थियो भन्ने विषय अनुसन्धानबाट स्पष्ट हुने छ । प्रहरीले घटनासँग सम्बन्धित प्रमाण तथा अन्य आवश्यक विवरण संकलन गरिरहेको जनाएको छ ।
लामो समयअघि भएको दुर्घटनामा घाइते भएका युवकको उपचारका क्रममा मृत्यु भएपछि प्रहरीले घटनालाई सवारी ज्यानसम्बन्धी कसुरका रूपमा अनुसन्धान अघि बढाएको हो । पक्राउ परेका दुवै जनामाथि कानुनी प्रक्रिया अघि बढाइने प्रहरीले जनाएको छ ।
