रौतहट । पछिल्ला चार दिनमा रौतहटमा भएका छुट्टाछुट्टै घटनामा कम्तीमा १० जनाको मृत्यु भएको छ। साउन २७ देखि ३० गतेसम्म जिल्लामा नदीमा डुबेर बालबालिकाको मृत्यु, आत्महत्या, सर्पदंश, पानीमा डुबेर बालिकाको मृत्यु तथा भारतको झारखण्डमा भएको सवारी दुर्घटनामा रौतहटका तीर्थयात्रीको मृत्यु भएका घटना सार्वजनिक भएका छन्।
चार दिनको अवधिमा मृत्यु हुनेमा बालबालिकादेखि वृद्धसम्म छन्। अधिकांश घटना वर्षायाममा नदी तथा पानी जमेको स्थानमा बालबालिकाको जोखिम, सर्पदंश र सडक दुर्घटनासँग सम्बन्धित छन्। यस अवधिमा आत्महत्याका तीन छुट्टाछुट्टै घटना पनि भएका छन्।
लालबकैया नदीमा दुई बालबालिकाको मृत्यु
साउन २७ गते रौतहटको देवाही गोनाही नगरपालिका–२ लक्ष्मिनियास्थित लालबकैया नदीमा नुहाउने क्रममा बेपत्ता भएका तीन बालबालिकामध्ये दुई जनाको शव फेला परेको थियो। एक बालक भने अझै बेपत्ता रहेको प्रहरीले जनाएको थियो।
मंगलबार दिउँसो करिब १ः५० बजे नदीमा नुहाउन गएका तीन बालबालिका नदीको तीव्र बहावमा परेर बेपत्ता भएका थिए। घटनापछि स्थानीय बासिन्दाका साथै नेपाल प्रहरी र सशस्त्र प्रहरीको टोलीले खोजी थालेको थियो।
रातभर खोजी गरेपछि बुधबार बिहान करिब ७ बजे घटनास्थलबाट करिब दुई दशमलव पाँच किलोमिटर दक्षिणतर्फ परोहा नगरपालिका–२ जिंगडवास्थित लालबकैया नदीमा दुई बालबालिकाको शव तैरिरहेको अवस्थामा फेला परेको थियो।
मृत्यु हुनेमा देवाही गोनाही–२ लक्ष्मिनियाका १० वर्षीय मोहम्मद रमतुल्लाह र १० वर्षीया सवनम खातुन थिए। स्थानीयले नदीमा शव तैरिरहेको देखेपछि प्रहरीलाई खबर गरेका थिए।
वर्षायाममा लालबकैया नदीमा पानीको बहाव बढ्नुका साथै नदीमा गहिरा खाडलसमेत बन्ने भएकाले बालबालिकालाई नदीमा एक्लै नजान स्थानीयले आग्रह गरेका छन्। घटनामा बेपत्ता अर्का बालकको खोजी भने जारी रहेको प्रहरीले जनाएको थियो।
कटहरियामा १८ वर्षीय युवक मृत फेला
साउन २८ गते कटहरिया नगरपालिका–५ बहादुरपुरका १८ वर्षीय रमेश जैसवाल आफ्नै घरको छतमा झुण्डिएको अवस्थामा मृत फेला परे।
प्रल्हाद साहका छोरा रमेशले घरको भुइँतल्लामाथिको छतमा रहेको पिलरको रडमा तारको पासो लगाएर आत्महत्या गरेको प्रारम्भिक अनुसन्धानबाट खुलेको प्रहरीले जनाएको छ। घटनाबारे जानकारी पाएपछि इलाका प्रहरी कार्यालय गरुडाबाट प्रहरी निरीक्षक प्रमोद खड्काको नेतृत्वमा टोली घटनास्थल पुगेको थियो।
घटनास्थलको मुचुल्का तथा प्रारम्भिक अनुसन्धान पूरा गरी शव पोस्टमार्टमका लागि प्रादेशिक अस्पताल गौर पठाइएको थियो। उनको मृत्युको कारण भने खुलेको छैन।
नवविवाहिता पनि घरमै मृत
साउन २९ गते वृन्दावन नगरपालिका–७ गढी टोलमा २० वर्षीया पूजा सहनी आफ्नै घरको माथिल्लो तलाको बरन्डामा झुण्डिएको अवस्थामा मृत फेला परिन्।
जोगी सहनीकी कान्छी श्रीमती पूजा करिब छ महिनाअघि मात्रै विवाह गरेर घरमा आएकी थिइन्। उनको विवाह भएको छोटो समयमै मृत्यु भएपछि परिवार र आफन्तमा शोक छाएको छ।
प्रहरीका अनुसार उनले काठको करोलामा सलको पासो लगाएको प्रारम्भिक अनुसन्धानबाट देखिएको छ। घटनाबारे उनका श्रीमान् जोगी सहनीकी जेठी श्रीमती किरण सहनीले प्रहरीलाई जानकारी गराएकी थिइन्।
मृतकको माइती सर्लाहीको बरहथवा नगरपालिका–१ हजरिया मलाहीटोलमा रहेको र उनीहरूलाई घटनाबारे जानकारी गराइएको प्रहरीले जनाएको छ। घटनाको वास्तविक कारण पोस्टमार्टम रिपोर्ट र थप अनुसन्धानपछि खुल्ने प्रहरीको भनाइ छ।
परोहामा १७ वर्षीया किशोरी मृत
सोही दिन परोहा नगरपालिका–४ लौकाहा टोलमा १७ वर्षीया प्रियंका कुमारी राम आफ्नै सुत्ने कोठामा मृत फेला परिन्।
रामप्रसाद रामकी छोरी प्रियंका बिहीबार राति करिब १०ः४५ बजे कोठामा झुण्डिएको अवस्थामा फेला परेकी थिइन्। उनलाई झुण्डिएको देखेपछि उनकी बहिनीले पासो काटेर तल झारेको प्रहरीले जनाएको छ।
घटनाबारे जानकारी पाएपछि अस्थायी प्रहरी पोस्ट लौकाहाबाट प्रहरी सहायक निरीक्षक रामनरेश दासको नेतृत्वमा टोली पुगेको थियो। थप अनुसन्धानका लागि जिल्ला प्रहरी कार्यालय रौतहटबाट प्रहरी निरीक्षक विश्वनाथ यादवको नेतृत्वमा अपराध अनुसन्धान तथा वैज्ञानिक प्रमाण सङ्कलन (SOCO) टोलीसमेत परिचालन गरिएको थियो।
घटनाको कारण खुलेको छैन। प्रहरीले परिवारका सदस्य, आफन्त तथा छिमेकीसँग सोधपुछ गर्दै घटनाका सबै पक्षमाथि अनुसन्धान गरिरहेको जनाएको छ।
सर्पदंशबाट ८ वर्षीय बालकको मृत्यु
साउन ३० गते गुजरा नगरपालिका–७ पल्टुवामा सर्पले डस्दा ८ वर्षीय छोटेलाल रामको मृत्यु भयो।
राजपुर नगरपालिका–१ घर भई पल्टुवास्थित मामाघरमा बस्दै आएका लालबाबु रामका छोरा छोटेलाललाई शुक्रबार राति करिब २ बजे सुतिरहेको अवस्थामा नाम नखुलेको सर्पले डसेको थियो। सर्पले डसेको करिब चार घण्टापछि बिहान ६ बजेतिर उनको मृत्यु भएको प्रहरीले जनाएको छ।
घटनाको जानकारी दिउँसो प्रहरी चौकी रंगपुरमा पुगेपछि प्रहरी टोली घटनास्थल पुगेको थियो। पोस्टमार्टमसम्बन्धी विषयमा विवाद भएपछि थप अनुसन्धानका लागि इलाका प्रहरी कार्यालय चन्द्रनिगाहपुरबाट प्रहरी नायब उपरीक्षक सत्यनारायण थापाको नेतृत्वमा SOCO सहितको टोलीसमेत घटनास्थल पुगेको थियो।
कानुनी प्रक्रिया पूरा गरी बालकको शव पोस्टमार्टमका लागि सरकारी अस्पताल चन्द्रनिगाहपुर पठाइएको प्रहरीले जनाएको छ।
कलभर्टको पर्खालबाट खसेर ५ वर्षीया बालिकाको मृत्यु
साउन ३० गते नै परोहा नगरपालिका–९ खापड टोलमा पाँच वर्षीया फातमा खातुनको पानीमा डुबेर मृत्यु भयो।
स्थानीय शेख मेहबुल हककी छोरी फातमा बिहान बाख्रा चराउन गएकी थिइन्। सोही क्रममा कलभर्टको पर्खालबाट खाल्टोमा खसेर जमेको पानीमा डुबेकी उनको मृत्यु भएको प्रहरीले जनाएको छ।
पानीमा डुबेको देखेपछि स्थानीयवासीले उनलाई बाहिर निकालेका थिए। घटनाको खबर पाएपछि प्रहरी चौकी रामपुरखापबाट प्रहरी सहायक निरीक्षक धीरेन्द्रकुमार झाको नेतृत्वमा टोली घटनास्थल पुगेको थियो।
घटनाको थप अनुसन्धान तथा मुचुल्काका लागि जिल्ला प्रहरी कार्यालय रौतहटबाट प्रहरी निरीक्षक विश्वनाथ यादवको नेतृत्वमा टोलीसमेत खटाइएको प्रहरीले जनाएको छ।
बाबाधाम यात्रामा गएका तीन रौतहटवासीको झारखण्डमा मृत्यु
यसैबीच भारतको झारखण्डमा भएको सवारी दुर्घटनामा रौतहटका तीन तीर्थयात्रीको मृत्यु भएपछि जिल्लामा अर्को ठूलो शोक थपिएको छ।
बोलबम यात्राका लागि भारतको देवघरस्थित बाबाधाम गएका गरुडा नगरपालिका–६ पोठियाहीका ६५ वर्षीय नवलकिशोर चौधरी, उनकी ६२ वर्षीया श्रीमती सुन्दरकला देवी र सोही स्थानका राजेश महतोका १२ वर्षीय छोरा शिवम महतोको दुर्घटनामा मृत्यु भएको हो।
शुक्रबार भएको दुर्घटनापछि भारतमै पोस्टमार्टम तथा आवश्यक कानुनी प्रक्रिया पूरा गरेर शनिबार बिहान करिब साढे ८ बजे नवलकिशोर र सुन्दरकलाको शव आफन्तले बुझेका थिए। नेपाल ल्याइएका दुवै शवको गरुडा–६ स्थित झाँझ खोलाको शिवनगर घाटमा शनिबार दाहसंस्कार गरिएको छ।
तर १२ वर्षीय शिवमको शव भने प्रादेशिक अस्पताल गौरको शवगृहमा राखिएको छ। उनका बुवा वैदेशिक रोजगारीमा रहेकाले उनी नेपाल फर्किएपछि मात्रै छोराको अन्त्येष्टि गर्ने परिवारले जनाएको छ।
बाबाधाम जाने क्रममा तीर्थयात्री सवार बस झारखण्डमा दुर्घटनामा परेको थियो। दुर्घटनामा रौतहटका अन्य तीर्थयात्रीसमेत घाइते भएको प्रहरीले जनाएको छ।
चार दिनमै १० मृत्यु, जोखिमका घटना दोहोरिँदै
साउन २७ देखि ३० गतेसम्मको चार दिनको घटनाक्रम हेर्दा रौतहटमा लालबकैया नदीमा दुई, छुट्टाछुट्टै आत्महत्याका तीन, सर्पदंशबाट एक, पानीमा डुबेर एक तथा झारखण्डको सवारी दुर्घटनामा तीन गरी १० जनाको मृत्यु भएको देखिन्छ।
मृत्युका यी घटनाहरूको प्रकृति फरक भए पनि पछिल्ला दिनमा वर्षायामसँग जोडिएका जोखिम पनि देखिएका छन्। लालबकैया नदीमा बालबालिका डुबेको घटना र कलभर्टनजिक जमेको पानीमा बालिकाको मृत्युले स्थानीय स्तरमा पानीजन्य जोखिम व्यवस्थापनको प्रश्न उठाएको छ। सर्पदंशको घटनाले पनि वर्षायाममा ग्रामीण क्षेत्रमा सर्पदंशको जोखिमलाई पुनः सतहमा ल्याएको छ।
त्यसैगरी, एउटै अवधिमा आत्महत्याका तीन घटना सार्वजनिक हुनु पनि गम्भीर सामाजिक चिन्ताको विषय बनेको छ। प्रहरीले ती घटनाको कारणबारे अनुसन्धान गरिरहेको जनाएको छ।
भारतको झारखण्डमा भएको सवारी दुर्घटनाले भने तीर्थयात्राका क्रममा सडक सुरक्षाको विषयलाई पनि उजागर गरेको छ। एकपछि अर्को घटनामा ज्यान गुमाएपछि चार दिनमै रौतहटका विभिन्न परिवारले आफन्त गुमाएका छन् भने कतिपय परिवार अझै शव बुझेर अन्तिम संस्कारको प्रतीक्षामा छन्।
प्रहरीले नदी, पोखरी, खाल्डाखुल्डी तथा अन्य जोखिमयुक्त स्थानमा बालबालिकालाई एक्लै जान नदिन अभिभावकलाई आग्रह गरेको छ। वर्षायाममा नदीको बहाव र पानीको सतह अचानक बढ्न सक्ने भएकाले विशेष सावधानी अपनाउन स्थानीय प्रशासन तथा सुरक्षा निकायले आग्रह गरेका छन्।
