२८ कात्तिक,रौतहट । मधेश प्रदेशका मुख्यमन्त्री कृष्णप्रसाद यादवले आज शनिबार प्रदेशसभाबाट विश्वासको मत लिने भएका छन् । सत्ता साझेदार दलहरूले समर्थन फिर्ता लिएपछि अल्पमतमा परेका मुख्यमन्त्री यादवले संविधानको संवैधानिक प्रावधान अनुसार विश्वासको मत लिन लागेका हुन् ।
विश्वासको मत लिने प्रयोजनका लागि सभामुख रामअशिष यादवले आज दिउँसो १:०० बजे बस्ने गरी प्रदेशसभाको बैठक आह्वान गरेका छन् । उक्त बैठकले मुख्यमन्त्री यादवले पेस गर्ने विश्वासको मतसम्बन्धी प्रस्तावलाई कार्यसूचीमा समेटेर निर्णयार्थ प्रस्तुत गर्नेछ ।
नेपाली कांग्रेस नेतृत्वको वर्तमान प्रदेश सरकारलाई सुरुमा समर्थन गरेका नेकपा (एमाले) का मन्त्रीहरूले गत असोज २५ गते सामूहिक राजीनामा दिँदै सरकारबाट बाहिरिएका थिए । लगत्तै, गत कात्तिक २० गते नेपाल कम्युनिष्ट पार्टी (माओवादी केन्द्रसहितका घटक) का मन्त्रीहरूले पनि सरकारलाई दिएको समर्थन फिर्ता लिँदै राजीनामा बुझाएका थिए । दुई प्रमुख दलले समर्थन फिर्ता लिएसँगै मुख्यमन्त्री यादव नेतृत्वको सरकार अल्पमतमा परेको हो ।
मुख्यमन्त्री यादवले विश्वासको मत लिनका लागि आवश्यक प्रक्रिया अघि बढाइदिन गत बुधबार नै प्रदेशसभा सचिवालयलाई औपचारिक पत्र पठाइसकेका छन् । विश्वासको मत प्राप्त गर्न आवश्यक पर्ने बहुमत जुटाउन उनी अहिले विभिन्न राजनीतिक दलका शीर्ष नेताहरूसँग लगातार छलफल र आन्तरिक संवादमा जुटेका छन् । मतदान हुनुअघिसम्म राजनीतिक सहमतिको प्रयास जारी रहने उनले बताएका छन् ।
कुल १०७ सदस्यीय मधेश प्रदेशसभामा सरकार गठन तथा विश्वासको मत सुरक्षित गर्न कम्तीमा ५४ प्रदेशसभा सदस्यको स्पष्ट बहुमत आवश्यक पर्छ ।
प्रदेशसभाको दलीय समीकरण अनुसार नेपाली कांग्रेसका २२, नेकपा (एमाले) का २३, जनता समाजवादी पार्टी (जसपा) नेपालका २७, नेपाल कम्युनिष्ट पार्टीका १५, जनमत पार्टीका १२ तथा संघीय समाजवादी पार्टी र राष्ट्रिय प्रजातन्त्र पार्टी (राप्रपा) का १–१ जना सांसद रहेका छन् ।
कांग्रेससँग आफ्नै २२ सांसद मात्र रहेका कारण मुख्यमन्त्री यादवलाई आफ्नो पक्षमा विश्वासको मत कायम राख्न थप ३२ सांसदको समर्थन अनिवार्य रूपमा जुटाउनुपर्ने कठिन चुनौती रहेको छ
