काठमाडौं,१६ बैशाख//
चक्रपथ विस्तारको दोस्रो चरण अन्तर्गत चीनको सहयोगसम्बन्धी सम्झौता बुधबार औपचारिक रूपमा सम्पन्न भएको छ।
भौतिक पूर्वाधार, यातायात तथा शहरी विकास मन्त्री सुनील लम्साल र नेपालका लागि चिनियाँ राजदूत झांग माओमिंग बीच उक्त सम्झौतामा हस्ताक्षर भएको हो।
सम्झौताअनुसार चक्रपथ विस्तारको दोस्रो चरणमा कलंकीदेखि बसुन्धारासम्मको ८.२ किलोमिटर सडक तथा पुल निर्माण गरिनेछ। यस परियोजनाका लागि चीन सरकारले करिब ११ अर्ब रुपैयाँ अनुदान उपलब्ध गराउने जनाइएको छ।
यसअघि सन् २०१९ देखि सुरु गरिएको पहिलो चरणमा कोटेश्वरदेखि कलंकीसम्मको सडक विस्तार सम्पन्न भइसकेको छ।
सम्झौतापछि मन्त्री लम्सालले परियोजना कार्यान्वयनका क्रममा समस्या आए तत्काल समाधान गर्दै आवश्यक सहजीकरण गरिने बताएका छन्। उनले उत्तर–दक्षिण सडक सञ्जाल विस्तार सरकारको प्राथमिकतामा रहेको उल्लेख गर्दै नेपालको पूर्वाधार विकासमा चीनबाट थप लगानीको अपेक्षा व्यक्त गरे।
चिनियाँ राजदूत माओमिंगले उपयुक्त लगानी वातावरण बनेमा थप चिनियाँ लगानीकर्ता नेपालमा लगानी गर्न इच्छुक रहेको बताएका छन्।
