वीरगञ्ज, असोज ११ गते । वीरगञ्ज महानगरपालिकाको आगामी नेतृत्वलाई लिएर बहस सुरु भइरहेका बेला विकास व्यवस्थापन तथा प्राविधिक क्षेत्रमा अनुभव हासिल गरेका इन्जिनियर मनोजकुमार गुप्ताको नाम चर्चामा आएको छ। वीरगञ्जको सहरी विकासलाई नयाँ ढङ्गले अघि बढाउन सक्ने व्यक्तिका रूपमा विभिन्न पेशागत तथा बौद्धिक क्षेत्रका व्यक्तिहरूले गुप्तालाई नेतृत्वमा आउन आग्रह गरेका छन्।
वीरगञ्ज देशकै प्रमुख व्यापारिक तथा औद्योगिक सहर भए पनि सहरी व्यवस्थापनका धेरै समस्या अझै समाधान हुन बाँकी रहेको उनीहरूको भनाइ छ। सडक, ढल, डुबान, फोहोर, पार्किङ, यातायात, वातावरण, स्वास्थ्य, शिक्षा र सार्वजनिक सेवा प्रवाहका समस्या समाधान गर्न दीर्घकालीन र योजनाबद्ध दृष्टिकोण आवश्यक रहेको बताइएको छ।
गुप्ताले वीरगञ्जको विकासलाई ठूला भवन, सडक तथा अन्य भौतिक संरचनामा मात्र सीमित गर्न नहुने बताउनुभएको छ। नागरिकले दैनिक रूपमा प्राप्त गर्ने सेवा, स्वच्छ वातावरण, व्यवस्थित यातायात, गुणस्तरीय शिक्षा र स्वास्थ्य तथा रोजगारीका अवसरलाई समेत विकासको मापदण्ड बनाउनुपर्ने उहाँको धारणा छ।
उहाँले वीरगञ्जको फोहोर व्यवस्थापनमा प्रणालीगत परिवर्तन आवश्यक रहेको बताउनुभएको छ। घर तथा व्यवसायबाटै फोहोर वर्गीकरण गर्ने, पुनःप्रयोग गर्न मिल्ने सामग्री छुट्याउने तथा जैविक फोहोरलाई प्रशोधन गरी उपयोग गर्ने प्रणाली विकास गर्नुपर्ने उहाँको प्रस्ताव छ।
वर्षायाममा देखिने डुबानको समस्या समाधानका लागि पनि दीर्घकालीन योजना आवश्यक रहेको उहाँले बताउनुभएको छ। सडक र ढल निर्माणलाई अलग–अलग रूपमा अघि बढाउनुको सट्टा महानगरको समग्र जलनिकास प्रणालीको अध्ययन गरी एकीकृत योजना बनाउनुपर्ने उहाँको भनाइ छ।
उद्योगसँग रोजगारी जोड्ने योजना
वीरगञ्जको औद्योगिक तथा व्यापारिक सम्भावनाबाट स्थानीय नागरिकले प्रत्यक्ष लाभ लिन सक्ने वातावरण बनाउनुपर्ने गुप्ताको धारणा छ। स्थानीय उद्यमशीलता, सीप विकास, स्टार्टअप तथा सार्वजनिक–निजी साझेदारीलाई प्रोत्साहन गरी रोजगारीका अवसर सिर्जना गर्न सकिने उहाँले बताउनुभएको छ।
युवालाई रोजगारीका लागि बाहिर जानुपर्ने बाध्यता कम गर्न स्थानीय उत्पादन र सीपलाई बजारसँग जोड्नुपर्ने उहाँको भनाइ छ। महानगरले निजी क्षेत्रसँग सहकार्य गरेर लगानीका सम्भावित क्षेत्र पहिचान र उद्यम सञ्चालनका लागि आवश्यक सहजीकरण गर्न सक्ने उहाँले बताउनुभएको छ।
डिजिटल सेवामा जोड
महानगरबाट सेवा लिँदा नागरिकले अनावश्यक समय र झन्झट व्यहोर्नुपर्ने अवस्था अन्त्य गर्न डिजिटल सेवा विस्तार गर्नुपर्ने उहाँको प्रस्ताव छ।
आवेदनको अवस्था, सेवा प्राप्त गर्ने प्रक्रिया र लाग्ने समयबारे नागरिकले अनलाइनबाटै जानकारी पाउने प्रणाली विकास गर्नुपर्ने उहाँको धारणा छ। महानगरका योजना, बजेट तथा खर्चको सार्वजनिक अनुगमन गर्न सकिने व्यवस्था आवश्यक रहेको उहाँले बताउनुभएको छ।
विकास क्षेत्रमा लामो अनुभव
गुप्ताले अन्तर्राष्ट्रिय विकास संस्था तथा विभिन्न परियोजनामा १७ वर्षभन्दा बढी काम गरेको विवरण सार्वजनिक गर्नुभएको छ। परियोजना व्यवस्थापन, वातावरण, नवीकरणीय ऊर्जा, विकास साझेदारसँगको समन्वय तथा नीतिगत संवाद उहाँको अनुभवका क्षेत्र रहेको बताइएको छ।
पर्सामा कार्यरत रहँदा गरिबी न्यूनीकरण, समुदाय परिचालन तथा वैकल्पिक ऊर्जासम्बन्धी कार्यक्रम सञ्चालनमा समेत उहाँ संलग्न रहेको बताइएको छ। स्थानीय स्रोत र प्रविधिको प्रयोगमार्फत रोजगारी सिर्जना गर्ने प्रयासमा पनि उहाँको भूमिका रहेको समर्थकहरूको भनाइ छ।
वातावरण तथा हरित प्रविधिका क्षेत्रमा समेत काम गरेका गुप्ताले स्वच्छ चुलो, ग्यासिफायर, बायो–पेन्ट तथा हस्क पेलेटलगायतका उत्पादनसँग सम्बन्धित काम गरेको विवरण सार्वजनिक गर्नुभएको छ।
‘पदभन्दा जिम्मेवारी ठूलो’
गुप्ताले नगर प्रमुखको पदलाई व्यक्तिगत प्रतिष्ठाभन्दा सार्वजनिक जिम्मेवारीका रूपमा लिनुपर्ने बताउनुभएको छ। महानगरका समस्या समाधानका लागि राजनीतिक नेतृत्व, कर्मचारी, निजी क्षेत्र र नागरिकबीच समन्वय आवश्यक रहेको उहाँको भनाइ छ।
निर्वाचित नेतृत्वले पहिलो सय दिन, पहिलो वर्ष र पाँच वर्षका प्राथमिकता स्पष्ट गरी नागरिकसमक्ष सार्वजनिक गर्नुपर्ने उहाँको धारणा छ। योजनाको कार्यान्वयन र त्यसबाट प्राप्त परिणामबारे पनि नेतृत्व नागरिकप्रति जवाफदेही हुनुपर्ने उहाँले बताउनुभएको छ।
हालसम्म गुप्ताले नगर प्रमुख पदमा उम्मेदवारी दिने औपचारिक घोषणा गर्नुभएको छैन। यद्यपि उहाँको नाम सम्भावित नेतृत्वका रूपमा चर्चामा आएसँगै वीरगञ्जको आगामी विकास, सहरी व्यवस्थापन, वातावरण, उद्योग–रोजगारी र सार्वजनिक सेवा प्रवाहका विषयमा बहस थप चर्किएको छ।
